أبدت النجمة صابرين تخوفها الشديد من انتقال عدوى فيروس كورونا منها إلى والدتها التي تقيم معها بنفس المنزل، وقالت باكية أن الفيروس انتشر في العائلة كلها، وحذرت جمهورها من خطورة الموجة الثانية لأن الفيروس يأتي بدون أعراض، كما نفت أن تكون إصابتها بالعدوى قد حدثت في حفل افتتاح مهرجان القاهرة السينمائي الدولي.
وقالت صابرين خلال مداخلة هاتفية مع برنامج “التاسعة” الذي يقدمه الإعلامي وائل الإبراشي عبر القناة الأولى: يا جماعة خلوا بالكم لأنها بتيجي من غير أعراض، دايمًا كان بيبقى فيه كحة جامدة وسخونة ونعزل الناس، بقينا كله موجب، وحاسة الشم فقط هي اللي بينت، لحد امبارح مكانش عندي أعراض، ابتدى بقى امبارح زوري بيحرقني أوي ومناخيري، وكل اللي شاغلني دلوقت ماما ربنا يسترها.
أضافت بصوت يبدو الاجهاد واضحا عليه: أخويا ومراتي معزولين في بيتهم ومراته تعبت قوي، يا جماعة أبوس إيديكم خلوا بالكم، الموضوع مش حلو ومفيهوش أعراض، لازم الإجراءات الاحترازية محدش يخرج إلا في الضرورة القصوى، معلهش إحنا نسينا شوية نغسل إيدينا ونحط كحول على طول، ومقدرش أحدد جاتلي منين، المتاعب بدأت من بالليل عندي، عندي أولادي 16 و14 سنة عزلوا نفسهم في أوضهم، بدعواتكم إن شاء الله هبقى كويسة.
ونفت صابرين، ما تردد حول إصابتها بفيروس كورونا، وانتقال العدوى لها بعد حضورها حفل افتتاح الدورة الـ42 من مهرجان القاهرة السينمائي الدولي يوم الأربعاء الماضي، وقالت: لم تنتقل لي عدوى كورونا من مهرجان القاهرة السينمائي، أنا كنت برش كحول على أيد أصدقائي إلهام شاهين وهاني رمزي وليلى علوي، وكانوا بيقولوا إيه المجنونة دي، وكنت متابعة الإجراءات الاحترازية بشكل كبير.
واستكملت: حاسة الشم هي اللي بينت إننا مصابين بكورونا، أنا عايش معايا في البيت مامتي وأخت جوزي، وبعدين اكتشفنا أن أخويا ومراته وجوزي وابني نور إيجابي كورونا، وحقيقي اللي خايفة عليها ماما.